Ahmed Hashem
446
شغّلت تقرير «رصيد المخزن بالتكلفة» بفلتر على مخزن واحد، وطلعت لي أصناف كتير الكمية فيها صفر لكن عمود القيمة فيه مبلغ، وبعض المبالغ دي بالسالب (ظاهرة بين قوسين). وكمان عمود «متوسط التكلفة» في السطور دي بيطلع 0.00 والقيمة مش صفر.
طريقة التسعير عندنا متوسط مش FIFO.
والغريب إن الحالة دي ظاهرة عندي في المخزن الرئيسي بالذات، وده مخزن مش بيبيع أصلاً — تحويلات بس للمخازن التانية.
السؤال: إيه سبب إن رصيد صفري يبقى له قيمة؟ وإيه الحل الصح لو العميل عايز يعرف قيمة مخزون مخزن معيّن؟
قيمة المخزون لمخزن بعينه ما لهاش معنى إلا لو النظام متابع التكلفة على مستوى المخزن. لو مش متابع، ما ينفعش تفلتر التقرير على مخزن وتبص على عمود القيمة — الرقم اللي هيطلع لك مش خطأ في النظام، هو ببساطة رقم مالوش معنى على المستوى ده.
فالسطر اللي كميته صفر وقيمته مبلغ معناه: الكميات اتعادلت في المخزن ده، لكن التكاليف ما اتعادلتش. السؤال بقى: ليه؟
افتراضيًا النظام بيمسك متوسط تكلفة الصنف على مستوى الصنف كله، مش لكل مخزن على حدة. يعني لما تصرف الصنف من مخزن، النظام بيسعّر الصرف بالمتوسط العام للصنف — مش بمتوسط المخزن اللي خرج منه.
والنتيجة المباشرة: جوه أي مخزن، التكلفة الداخلة والتكلفة الخارجة مش مضمون إنهم يتعادلوا حتى لو الكميات اتعادلت والرصيد بقى صفر. الفرق بيفضل ظاهر كقيمة بدون كمية.
وفيه علامة مميزة للحالة دي: غالبًا هتلاقي نفس الصنف في مخزن تاني بكمية صفر وقيمة بنفس المقدار تقريبًا بالإشارة العكسية — يعني لو جمعت المخازن كلها الفرق بيختفي.
وده بالظبط سبب إن المشكلة ظاهرة عندك في المخزن الرئيسي: هو مخزن التحويلات، أكتر مخزن بيدخل ويخرج منه، فأكتر مخزن بيتراكم فيه الفرق ده.
لو الصنف اتصرف قبل ما يكون له رصيد فعلي، بتكون تكلفته وقت الصرف غير معروفة، والنظام بيسعّرها ثم يصححها لما يدخل الرصيد. والعملية دي بتسيب فروق في التكلفة.
ونقطتين مهمتين هنا:
١. المكشوف مش بيع بس. أي صرف أو تحويل ممكن يعمله. وكمان ممكن يحصل بأثر رجعي من غير ما حد ياخد باله: مثلاً تسجّل رصيد افتتاحي، تعمل عليه تحويلات، وبعدين ترجع تعدّل الافتتاحي بتاريخ قديم — فتبقى الكمية سالبة في لحظة زمنية سابقة.
٢. علشان تمنع المكشوف 100% منع المكشوف العادي مش كفاية. منع المكشوف العادي بيتحقق من الرصيد وقت الحفظ، مش من الرصيد في تاريخ المستند. اللي بيقفل الباب ده هو خيار «التاكد من السحب على المكشوف بالتاريخ» في إعدادات سلسلة الإمداد ← تبويب «السالب والتحقق من الكميات» ← مجموعة «التحقق من الكمية بالتاريخ». الخيار ده مفعّل افتراضيًا، فالمهم تتأكد إن حد ما قفلوش.
ومشاكل التكلفة الناتجة عن المكشوف اتعالجت في الإصدارات الأخيرة، لكن لو البيانات قديمة فآثارها ممكن تكون لسه موجودة.
ولو المكشوف كان في تحويلات مخزنية بالذات، ممكن تظهر لك كمان رسالة حرجة نصها «There are inconsistent transfer costs» — دي نفس عيلة المشاكل ولها إجراء علاج مستقل موضح هنا: ما معنى رسالة "There are inconsistent transfer costs" وكيف يتم حلها؟
تفاصيل خيارات المكشوف كلها هنا: إعدادات السحب على المكشوف والتأكد من الكميات
لو مش بتتابع التكلفة على مستوى المخزن:
شغّل التقرير من غير فلتر على المخزن. الإجمالي على مستوى الشركة سليم وبيطابق الحسابات.
لو العميل فعلاً محتاج قيمة مخزون لكل مخزن — يبقى لازم تتابع التكلفة على المخزن:
١. فعّل خيار «متابعة التكاليف للمخزن» في شاشة «إعدادات صنف» (التبويب الرئيسي) على إعدادات الأصناف المطلوبة. خد بالك إن ده خيار على إعدادات الصنف، مش خيار عام على المخزن أو على الشركة. والإعدادات الافتراضية للأصناف توصل لها من إعدادات سلسلة الإمداد ← تبويب «التكاليف» ← مجموعة «تتبع الكمية والتكلفة» ← حقل «الإعدادات الافتراضية».
٢. النظام بيمنع تغيير الخيار ده بعد ما يكون على الصنف حركات، وهتظهر لك رسالة بكده. عشان تقدر تغيّره لازم تفعّل خيار «السماح بتعديل متابعة الكميات و التكاليف بعد استعمال الصنف» في إعدادات سلسلة الإمداد.
٣. بعد التفعيل لازم تعمل إعادة معالجة للتكاليف من تاريخ البداية، عشان الحركات القديمة تتحسب من جديد على مستوى المخزن. من غير الخطوة دي البيانات القديمة هتفضل زي ما هي. الخطوات كاملة هنا: إعادة معالجة الكميات والتكاليف
٤. راجع إن مفيش سحب على المكشوف، واتأكد إن التحقق بالتاريخ مفعّل زي ما هو موضح فوق.
بعد كده كل مخزن هيبقى ليه متوسط تكلفة مستقل، وقيمة المخزن هتبقى معبّرة فعلًا، والمقارنة مع الحسابات هتظبط لكل مخزن على حدة.
ما تعدّلش التقرير بحيث ما يجيبش السطور اللي فيها قيمة بدون كمية. ده بيخفي المشكلة مش بيحلها، وأول ما العميل يقارن التقرير بأرصدة حسابات المخزون في الحسابات هيلاقي فرق مش هيعرف يفسّره — وهيستنتج إن النظام بايظ.
ملاحظة: خيار «إخفاء الارصده الصفرية» الموجود في التقرير نفسه بيخفي السطور اللي الكمية والقيمة فيها الاتنين صفر، فهو مش هيخفي السطور اللي إحنا بنتكلم عنها أصلاً.
تقدر تعمل تقرير يحسب قيمة المخزن = الكمية × متوسط التكلفة بدل ما يجمع التكاليف. ده بيدّي قيمة معقولة للعرض لكل مخزن، بس بشرطين:
ويفضل دايمًا إنك تتابع سبب المشكلة الأول وتتأكد إنها فعلاً مسألة عدم متابعة التكلفة على المخزن مش سحب على المكشوف، قبل ما تتجه لأي حل عرضي.
الف شكر يا هندسه على الشرح الوافي وان شاء الله امشي ع الخطوات جزاكم الله خيرا
